Bar 3

a3.9Min 4.20-22

c3.15Yob 28.12, 28.20

d3.26Pig 6.4, SMG 14.6

1 Isaraele wali agalinaga Ngode Datagaliwabe-o í̠ Anduane Homogo Hongo Haiheore kegoni. Inanaga miniha genda tara tara yu howa í̠hondo olalu kema. 2 Anduane Homogo-o iname í̠naga deni howa mana ko dewaore bialu harimago ainde í̠na ina dara habe. 3 Í̠ kiniore howa haabo haga kegola ina wali agali homalu ereba hagane kemagoni ndobe. 4 Anduane Homogo Hongo Haiheore howa í̠ Isaraele wali agalinaga Ngode Datagaliwabe kego ina wali agali ko biaga bu heneru aguane kemarume í̠hondo bi lalu kemago hale habe. Tigua i̱naga bi mo wahalu penegome tinaga genda iname yu aribia ho kemagoni. 5 Ainde mana ko inanaga mamalirume bialu hene ngarunaga mo wiaho haabo nahabe. Í̠ninaga mini yaraga hene timbuni kegobi í̠naga hongo timbuniore ngegobi mitangi bibe. 6 Í̠ inanaga Ngode Datagaliwabebi Anduane Homogobi í̠ hanguore kego manda bialu mo yaraga halu holeberema. 7 Iname í̠ olalu holoma̱yanaga í̠nime inahondo mo gi halu haga ke. Ai ina mamalirunaga mana ko biniru wahai ho kemagome ainde garabaya andaha kemago howa í̠naga mini yaraga halu holeberema. 8 Ainde í̠na de handa dali halu wali agali darabi garabaya bu kemaru nde de handabe. Wali agali tara dindi taraha bu hearume hondo mege bialu tigua inahondo bi ko ngaru laedede bialu helonaga ina dindi taraha pelariya. Anduane Homogo inanaga Ngode Datagaliwabe-o inanaga mamali tigua í̠hondo mine howa í̠ erembira ngialu piyagome ko timbuni biya. Anidagua binigome ko uruni inaha wua dambi hai kagola ina wali agali ko biaga mini leneore kemagoni ndobe.

Wali agalinaga bu miniha mo palia ho holenenaga bi lo nga.

(3.9—5.9)

Mini gigabi wulene ibu galoneore nga lenego ogo

9 Isaraele wali agali bu kemiru tígua mana lo wini ngagome bi ledago baya hangu hale hadaba. Mana lo ngagoha howa bi laragome tí haabo holene hariga ngagoria haru halu polebira. Ani bulenaga tígua bi larago baya hanguore hale halu lo manda bialu halimu. ^a 10 Isaraele wali agali tí dindi tara waitigi ti dalu ngagoha íbu howa hodagua hene kemigo irane agibe. 11 Tí Ngode Datagaliwabenaga deni wali agali ko dodohe homene ngaligobi kemigo irane agibe. ^{▼▼(3.11)Agali manda timbunibi hearume bi ogoni irane ogodagua leda laya. Isaraele wali agali wali agali tara bu hearu ti dege dombeneha bu karu ti Ngode Datagaliwabenaga deni dodohe kemi leda. Isaraele Anduane Homogo manda nabiaga karu heaba mandagi ela hagabu kago ti dodohe ka, lalu leda.} 12 Tígua Ngode Datagaliwabe kago wahalu pirimigoni irane tíha mini gigabi wulenebi manda bayale bulenebi nawi kemigome pirimi. 13 Tígua ibunaga hariga ngagoria ibagabu kemile nde tínaga holene baya gibiore ngagoria kemile. 14 Tígua hongo holene tene ngagobi manda bayale bulene ngagobi mini bayale ngagobi mo yu holenaga hongo howa taya bilimu. Anidagua beremigola tí dindini luore holenebi hariga mo walia holene halebi ngialu kagola tinaga holene baya gibiore ngagoria holeberemi.

15 Tí henedagoha howa mini gigabi bayale wu holene nga ái í̠na handa walia haribe. Mini gigabi wulene anda timbunioreha ngago anda ogoniha mbirali ái anda pirimibe. ^c 16 Agali hariga uruni pu manda bialu haga heneru tini áyu nahe. Agali hariga uruni pu manda bialu henedaru agali dindi mbiranaga haguane henerubi agali maru gabua tara tararubi ega irabuha minana biru ngarubi uruni baba gini bialu talima ibaga bialu haga henerubi agali maru ngolo silibaru dewaore wule hamelo howa biabe erekuibiore bialu ilu wia dege bialu haga henerubi 18 agali marume biabe ndelaheore bialu silibame mbirale yári bulene ale tara tara wabiaga bu henerubi ti pialu hene. 19 Ai agali ala hene uruni ti agoha yagi pu kabe. Ainde ti homeneru dalu humbirini andagaha piyagola maru mani ho aribia halu homayarunaga henge karulo ho aribia haya. 20 Uruni ti halu homeaha wali agali daliahe maru dindini ho aribia henego ainde tiguabi mini gigabi wulene hariga ngago handa walia nahe dege howa tigua hariga ogoriani kaware nape hene. 21 Ani bialu ti waneiginimebi pu manda bialu henego pobe nahe dege hene. 22 Kenanalimebi Idomoali bu heneru tiguabi mini gigabi wulene taya bialu henego ainde tiguabi nakarulape dege hene. 23 Agali Merane dindiha biyinaya biaga hearumebi Tema dindiha hearumebi pu manda bialu henego tiguabi mini gigabi wulene ogoni handa walia nahe hene. Ani bialu agali bi te laga bu henerumebi manda taya bialu haga bu henerumebi mbira handa walia holene nakarulape dege hene.

24 Isaraele wali agaliru-o baya hangu hale haremine. Ainde Ngode Datagaliwabe ibunaga dindi ngago wu maro nabiore wuyu pu dege bialu timbuniore nga ndobe. 25 Ibu dalu ogoni wu maro nabiagabi mbiralime dindi ogoni luninaga manda bulenebi arane yangalenagabi mbiralime ogobi nga lalu manda buwa latagi habe naheore nga. 26 Dindi ogoni bambaore agali wai biagane mana mandabi howa agaliha tabetabe nabi timbuniru taba heneneyago dindi ogoniha taba henene. ^d 27 Anigo Ngode Datagaliwabehanda agali uruni ti ibunaga wali agali helo daba nabini. Ani bialu ibugua tihondo mini gigabi wulenenaga hariga mo walia nahe hene. 28 Wali agali uruni tiha mini bayale wulenebi manda bayalebi tubagi ho howa abale homai halu biba hene.

29 Agali mbirame mini gigabi wulene ogoni hari beraliba kagoha irigi halu puwa taya bu yalu dai bini ndo. 30 Agali mbirame iba solowara timbuni bedagoha iba sibini biralu ibaga biai halu mini gigabi wiaria handa walia halu ngolo baya yolo dewaoreme mulene ngagome yolo bu yalu dai bini ndo nga. 31 Mbirali hangume pialu mini gigabi bayale taya bima puwa ibu ngagoria ngola halubi ibu kagoha polenaga hariga handa waliabi nahe dege hene.

32 Mini gigabi wulene ibu nde mbiraorego Ngode Datagaliwabela haabo hagane nga. Ibugua ibuninaga manda bayale ngagoha ngaria handa walia hagane nga. Ibugua dindi ogo ani wiaabo helonaga wabialu ema bialu piaga tara tararubi dindini ibagabu helo wabia dege bini. 33 Ibugua wá holene bibahendeha hame helaga ka. Ani bialu wá holene ibuni karia abale dai bia laragola hale haga. 34 Ibugua yakundi bu karu olaragola tigua abaleore hale halu ladai biaga ka. Yakundi tigua tini haga ngagoria haabo halu tigua tini wabu helaga Ngode Datagaliwabe kagonaga mini yaraga holene turu howa wá ha amunana bialu haga ka. 36 Ogoni ibu inanaga Ngode Datagaliwabe kago ibu mendealila nakarulapeore ka. 37 Horo ogoningi mini gigabi wulene ogoni ibu dindini ibalu ina heba mandagi ka.